未到聖誕節，亦過咗萬聖節！GC突然間爆咗隻《MARIOKARTDoubleDash!!》PartyGame出嚟！唔好問筆者「隻Game好唔好玩？」咁愚蠢嘅問題，雖然冇乜開Party嘅藉口，不過現實是筆者部測試機，日日聚集咗一大班人打《MKDD!!》，𠵱嘩鬼叫到拆天咁款；打好Game同開Party一樣，只要開心，又使乜理由！
記者：朱崇德
自超任年代推出首隻《MARIOKART》（1992年），其後重出過N64及GBA版；跨越了11個年頭，到今個星期最新推出呢代GC版《MKDD!!》，一直都係走一大堆人開心齊齊玩嘅Party路線！放落任天堂新次世代主機GC之上，畫面大大改進已是必然！不過最令人振奮是《MKDD!!》透過LAN作連線對戰（60fps），可作8人、8主機、8電視對戰！而尤有甚者，如以Modem作連線（20fps），最多更支援到16人同時間對戰，真係歷代《MARIOKART》玩得最大嘅Party！
按原定出Game時間表，歐美等地要在本月17號先有Game，不過香港就跟日本差唔多同步，今個星期已經有《MKDD!!》到手，絕對快人一步有得玩！一開機最驚喜之處，是出場人物係咁多集以來最多嘅16個！首度登場人物有孖寶兄弟嘅小寶寶——BabyMario&Luigi及青蛙仔女友Catherine等！
主要遊戲模式為格蘭披治賽，旗下細分為草菇、花花及星星三個盃賽，共12條賽道！但唔好以為咁就爆機！因為車組又細分為50、100及150cc（cc愈大，難度愈高），要真正爆機必須要打足三循環！據知每贏一個盃賽就會取得隱藏車一部，這是歷代《MARIOKART》重未有過的新元素！而且據香港網站上的機友報告，爆機後重會有三個隱藏盃賽和一部叫「金草菇」的終極隱藏車，真係叫人一打難以收手！
突破過往的玩法，今集《MKDD!!》是以一車兩人的打法！基本一人專責揸車，一人負責投道具（遊戲中途按Z可換轉位置），所以在最多支援8架車同時作賽下，可以16人連線齊齊玩！
車種及人物重量亦是遊戲新加入的元素；今集玩家可以隨意選擇自己喜好車種及人物，不過就有重量計算，輕型車只可搭載（輕＋輕角色），中型車可搭載（輕＋中?中＋中角色），而重型車就可載（輕＋重?中＋重?重＋重角色），所以出來的情況會是角色屬性愈強，汽車能力會相應調低，從而達至遊戲的平衡度！
「超級攻擊」亦是遊戲新着眼處！據人物屬性，不同道具在不同人手上會有等別效果，例如以蕉皮為例，在一般角色下，它只是一塊小蕉皮，但如DonkeyKong及DiddyKong攞到，佢就會變成霸住半條馬路嘅霹靂無敵大蕉皮，俾人踩中後重會一分為三，一樣有攻擊判定！
《MARIOKARTDoubleDash!!》
開發商：Nintendo
主機：GameCube
類型：賽車
發售日期：已發售
價錢：$380
售賣點：DreamStore
地址：灣仔東方188商場256號舖
(C)2003Nintendo
