梅艷芳前晚在紅館開騷，她在台上表示最大心願是可以穿婚紗，而她在完場前就穿上一襲拖尾婚紗。昨晚舉行第二場，阿梅在演唱亡友張國榮及陳百強的歌曲時，兩度泣不成聲。
梅艷芳前晚在紅館揭開八場個人演唱會的序幕，她早前親口證實患上子宮頸癌，但憑着她的頑強鬥志，前晚終順利地為個唱演出。
昨晚梅艷芳舉行第二場演唱會，當阿梅獻唱故友張國榮的《今生今世》及陳百強的《深愛着你》時，兩度傷心感觸，泣不成聲，令歌曲出現停頓，現場觀眾亦為之動容。
而演唱會舉行前，阿梅如常舉行拜神儀式，梅媽昨晚仍有到場支持愛女，而容祖兒和母親及狄波拉等均有往捧場。
而阿梅前晚在演唱會上共唱了二十一首歌，以慢歌為主，阿梅落力的演出，得到台下觀眾熱烈支持。而阿梅在「安哥」時，換上拖尾的婚紗出場，阿梅說：「我着婚紗靚唔靚？」台下有男觀眾即高呼：「嫁畀我。」阿梅續說：「我係演員，着過婚紗好多次，真實生活相信無法做到。」
台下又有男觀眾要阿梅嫁畀佢，阿梅說：「如果你夾硬就唔好。」此時亦有女觀眾說：「嫁畀我。」阿梅說：「點解有女人聲，我又嫁唔到畀你，我自己真係想有一次機會咁多，畀我試吓着婚紗嘅感覺，我諗不如喺演唱會度着畀大家睇，希望大家睇完考慮一吓我，我幾好，唔錯㗎。夕陽無限好，只是近黃昏。」
阿梅又興歎地說：「明天會更好，我知呢啲嘢冇得勉強，我相信命運，我相信假如另一半會出現的話，喺我六十歲時都會搵到，不過重要等多二十年。珍惜時就要珍惜，黃昏好靚，夕陽都好靚，不過眨吓眼就過去。」之後阿梅唱了《夕陽之歌》作結，然後緩緩地步上舞台上的樓梯。
而阿梅在早段演唱時，又以性感bratop示人，並蹲在外籍男舞蹈員前跳舞，意態撩人。阿梅之後當眾整頓bratop，她說：「等我掹埋啲，露咁多做乜？」
阿梅在中場時又有感而發說：「我曾經問自己應唔應該繼續唱落去，還是另有啟示，我諗通咗人生太過無常，既然唔知聽日事，不如做好今日事。我有啲朋友唔喺度，我默默唱歌送畀佢哋。」
阿梅便唱了羅文的《愛情的代價》、張國榮的《今生今世》和陳百強的《深愛着你》等歌曲。
採訪：李珮洳
攝影：林德雄
