有五十年歷史、樂聲牌電器嘅代理信興集團，噚日喺灣仔會展搞咗個大型慶祝酒會，創辦人兼集團主席蒙民偉當然夠晒面子，到賀嘅全部都係粒粒巨星，包括新世界主席鄭裕彤、賭王何鴻燊、嘉華呂志和、東亞李國寶一家（老婆同兩個仔），重有久未露面嘅電影大亨、嘉禾鄒文懷夫婦。
當然，一定唔少得阿董，但佢全程都有幾十名保安圍住，勁過克林頓，簡直潑水不入，想去問吓佢秋官辭官歸故里嘅反應都唔得。有行家話，要影董建華不如影鱷魚好過，起碼鱷魚都會自己蒲頭擺甫士，阿董就……
都係講番蒙民偉。佢呢排因為五十周年慶祝，經常蒲頭，簡直係應接不暇。八方最近收到新一期《信報月刊》，都有蒙氏父子訪問；提到接班人問題，蒙民偉老實不客氣，話自己個仔蒙德揚未夠班，所以自己重未可以退下火線，佢重講到兩代人用嘅親信都唔同，確實係典型華資企業嘅真實寫照，只不過人哋唔夠蒙老咁直率啫。
傳真︰2623-9278
電郵︰
