商台昨日舉行《叱咤樂壇流行榜頒獎典禮》記者會，拍拖出席的朱茵及黃貫中（Paul）重提篤爆他們遊泰國之嫌疑犯時，在場的黃家強竟滿臉尷尬，Paul更揚言：「朋友咁篤我，我會當場開拖。」
商台昨日假九龍灣國際展貿中心舉行《2003年度叱咤樂壇流行榜頒獎典禮》記者會，不少緋聞男女濟濟一堂，有鄭中基與楊千嬅、余文樂與盧巧音及鍾欣桐（阿嬌）、而拍拖出席的有黃貫中及朱茵，其他的有容祖兒、許志安及梁詠琪等，而鄭秀文、陳奕迅、劉德華及陳慧琳等則未有到場。
早前朱茵牛一，Paul帶女友遊泰國慶祝，但卻被周刊全程偷拍，事後朱茵曾指疑為男友身邊人放料，昨日當傳媒拉朱茵與Beyond三子拍照時，黃家強及葉世榮竟彈開，家強一臉尷尬，雖然四人終有合照，朱茵亦稱是航空公司報料，但Beyond三子卻似因朱茵告狀一事而避忌。
問Paul是否仍懷疑身邊人為二五仔？他說：「唔可以抹煞呢個可能性，總之我心中有數，畀我知係邊個就煎佢皮拆佢骨。」未知他會否懷疑是自己的兄弟？Paul即說：「唔係，我身邊有好多人，但我絕對百分百信任家強同世榮，朋友咁篤我，我會當場開拖。」這時在旁的世榮即喃喃說：「吓，連我哋都唔知佢去旅行。」而家強則對記者尷尬地說：「我趕住錄音，有冇嘢問呀？冇就走先啦。」
朱茵對家強表現尷尬卻稱：「佢尷尬乜嘢？冇留意喎，我作為阿Paul女友，唔應該喺佢三兄弟中講嘢，我亦冇講過任何嘢，我同佢哋冇不快，如果呢件事令某啲人尷尬或者誤會，唔好意思，希望體諒，捉呢隻鬼可能要犧牲一啲嘢，好抱歉。」
家強則說：「當時我喺內地做緊騷，我重以為你哋講緊上次我笑阿Paul係處男嗰單嘢㖭，嗰次我都係講吓笑啫。」
此外，昨日大會雖刻意安排男、女歌手及新人分席而坐，但當盧巧音出場時，舊愛余文樂竟擔天望地。由於大會要求每位歌手要取出一件物件扮拍賣，以配合「叱咤旗艦店」主題，當鄭中基拿出大堆頭的鼓具時，楊千嬅見狀竟大笑起來。
採訪：王連連、李珮洳
攝影：陳偉權
