榮升國際級流行歌手嘅Dido，日前去咗日本宣傳佢張勁好賣嘅新碟《LifeForRent》，《蘋果》嘅特約記者森林檎，當日亦有去東京ParkHyatt酒店，直擊Dido個記者會。當日場面都算墟冚，因為除咗日本記者之外，重有港、台同印尼等亞洲傳媒到場採訪，而Dido亦好識做，以性感背心亮相，令人有透心涼嘅感覺。
為新碟再次蒲頭四出宣傳嘅Dido，呢期打扮起上嚟比起以前更加明豔照人，佢亦經常着得比以前性感，嗰日當然亦唔例外。
Dido憑處女大碟《NoAngel》賣出一千二百萬張嘅銷量，成為國際知名嘅英國女歌手。在場有記者問佢紅咗之後有乜改變，Dido好率直咁話：「紅咗之後雖然多咗好多狗仔隊喺我屋企門口，但我唔會好驚，最多都係叫啲警察幫我趕佢哋走。」
提到成為八卦雜誌追訪對象，Dido重好好笑咁話：「其實每次我睇到自己出現喺啲八卦雜誌嗰陣，都覺得自己好蠢同好笨，因為自己唔知啲狗仔隊喺我屋企乜嘢位置拍到我。」
Dido更強調自己紅咗後冇乜特別嘅改變，而且佢喺台上就連再次去訪問佢嘅香港記者個名都記得，認真好記性。不過Dido原來好怕對住閃燈，佢最初企定畀記者影相唔夠三分鐘就走，之後坐喺梳發畀人影相，唔夠一分鐘又即刻想閃人。