寶Baby李國寶真係料事如神，佢話：到時到候，自然有人勸秋官辭職。話口未完，真係，《蘋果》獨家影到何志平、鄔維庸喺置地廣場同秋官密斟之後，第二日秋官黯然宣布辭職。
不過，秋官見記者好似宣判緊一名重犯入獄十年咁嘅表情，佢話，由於得唔到支持，有被離棄嘅感覺，同埋受到傳媒「聯手審判」，所以焗住要執包袱。
得唔到支持而被離棄？呢一樣，就係佢舊校友阿董冇義氣，不過佢話受到傳媒公審，就唔係咁公正，法官講嘢，要理性冷靜，一開口成個土共咁嘅腔調，就會令司法界形象受損。
秋官事件經傳媒報道，引起公議，喺一個言論自由嘅社會，係好正常，秋官幾十歲人，留學英國，唔使八方從頭教佢，佢應該知道，連《基本法》都保障香港新聞、言論、出版自由，如果佢不滿，可以向人大常委會投訴。
就算真係有傳媒審判，秋官出事之後，反為有人向喺七十年代報格曾經好高尚嘅某報大量放料，披露大量平機會機密文件，又話胡紅玉請佢大姑奶，又話使咗幾多錢，並有兩張左報助陣，向胡紅玉進行輿論反審判㖭。王見秋唔係孤立無援，有大把愛國喉舌幫佢叫陣。可惜，民意嘅陪審團，對佢嘅行為，唔係咁欣賞，咁又何來「傳媒聯手政治迫害」？
傳媒聯手公審，如果真係咁有神效，咁阿董夠俾好多傳媒審判咗六年，7.1大遊行，成五十萬人示威公審阿董，點解唔見阿董落台？因為北京嘅胡溫哋冇離棄阿董。所以，阿董、何志平、智囊鄔維庸，最後唾棄秋官，先至係秋官要劈炮嘅決定性原因。秋官要吸取教訓，經一事，長一智，以後帶眼識人。幾十年校友都係假，政治呢味嘢，可以令人好快咁變臉，噚日都重係春風滿面，今日就可以秋風秋雨愁煞人，秋官讀吓佛經，就知道點樣戒貪嗔癡，無欲則剛，心無障執，秋官唔應該向傳媒發洩囉。
做人最緊要保全晚節，唔好老來受辱，秋官幾十年來，做到大法官，贏得社會地位，估唔到俾一位舊校友累到清譽一朝喪。兩個都係利物浦大學畢業，呢間大學認真邪，咪以為留學外國就一定叻過人，父母送仔女去英國讀書，有時不如留番喺香港升學，又近祖國，又近阿媽啲湯水，橫掂讀完返嚟講嘢諗嘢都係咁無厘頭，何必咁嘥錢。
平機會主席嘅空缺，做生不如做熟，不如求番胡紅玉官復原職吖。不過，睇怕佢多數都見過鬼怕黑咯。
至於另有法官領雙重福利嘅問題，就重未收科，李國能都係時候出嚟解吓畫嘞或者。
傳真︰2623-9278
電郵︰