今年積極賣樓嘅長實，年底前除會推土瓜灣傲雲峰之外，重有打西鐵概念嘅元朗四季雅苑。負責呢次賣樓嘅話事人，唔係以往見慣見熟嘅營業經理，而係一向喺幕後負責廣告同市場推廣嘅廣告部高級經理袁添鴻（洋名Kenneth），加入長實10幾年嘅佢，講到負責前線賣樓，今次可謂初試啼聲。
聽Kenneth講，接手呢個項目有兩個幾星期，雖然話係第一次賣樓，都難唔到佢喎。皆因佢平時做市場推廣同廣告，都好留意客戶嘅需要，認為市場部同營業部屬於同一組工作，只係分工唔同。
噚日朝早，長實帶埋樓盤模型出席中原地產活動，介紹物業資料，項目有成百幾間獨立屋，分2500至3200方呎嘅3房同4房間隔，重連天台同花園，最快1至2周有得睇示範單位。
地鐵坑口站上蓋嘅蔚藍灣畔，發展商信和集團向來注重住客會所設施同園林設計，呢個盤就快開賣，園林布局自然係賣點之一。除咗大灑金錢，花兩億興建18萬方呎會所外，平台花園設計都十分講究。
喺戶外80米大型泳池旁邊，建有一條長達200米嘅長廊，由第1座伸延至第6座，呢條直路上，將設有100個參照意大利式嘅噴泉做襯托，加上燈光效應，都幾夠情調。
大型戶外泳池重包括幾部份，就係溫泉區、水力按摩池同埋足部按摩池，當然唔少得兒童戲水池，幾有睇頭。會所裏面有間供住戶使用嘅2000幾呎「主席屋」，信和重喺售樓處裏面，搭咗個模擬辦畀睇樓人士參觀。
中環士丹頓街49號地舖，750呎，噚日以425萬元連租約成交，每月收1.25萬蚊，租金回報率只得3厘半，較同區𠵱家約有6厘回報低好多！中原黃偉基話，買家睇好嗰區發展潛力，又預期租約屆滿後，可以加租先至肯買。
另外，旺角明年有大型商業項目朗豪坊落成，舖王波叔喺隔籬亞皆老街旺角商業大廈有個3000呎地舖，索價1.2億，每呎4萬，與市價兩萬蚊呎有段距離。
去年馬灣珀麗灣賣樓時，落力推介嘅greengreenclub，下個禮拜一就啟用，發展商趁周末先行開放畀之前登記咗嘅1期向隅客參觀。
會所以大自然綠林為主題，所以周末都特別搞咗個「尋找珀麗灣綠野仙蹤」嘅活動。蘭西噚日睇過，最鍾意會所佔地3000方呎嘅小型動物園，有孔雀、蜥蜴等動物，可以考眼力尋找小動物。
蘭西
電郵地址：
