「婦女銀袋賽」散場之後，惡佬明提議去沙田陳太屋企打牌，於是由佢揸車入火炭。入火炭條馬路係新鋪嘅（其實搞咗成三四年），又闊又直，一踩油，架車去得好快，惡佬明行錯條中線，唔記得行右線等紅綠燈轉入去駿景園，於是順勢上咗入火炭工業區嘅天橋。嘩死咯，上咗天橋唔夠三十米，架車震到飛起，隆然聲，架車跌番落地，左丁山個頭擱在座椅上，彈起再碰落去，為之痛痛哋、暈暈哋，好似腦震盪。
惡佬明當堂媽聲四起，事關並唔係架車有事，而係新鋪好嘅天橋路面有凸位害人也。佢條氣唔順，特登轉左入火炭兜個大圈出番去體育學院，返轉頭又入過火炭天橋，呢次慢車行走至車速五十公里，咦，冇乜事噃，架車係咁意震一震啫。
以惡佬明多年建築經驗，佢認為係天橋駁口施工不良，有凸位，造成一條隱藏性嘅ramp。但因為落天橋有四條行車線，逢係司機都唔會（亦唔知）行到駁口位就自動慢車嘅，所以除咗係日日路上行嘅住客或者小巴司機之外，個個中計。惡佬明話：「路政署冇理由肯收貨嘅，都唔知佢哋有冇檢驗過路面！」左丁山呢日幾乎震親個腦，如果有巴士司機唔知，上火炭天橋飛車，婦嬬老翁乘客分分鐘整親腰骨都似，到時都唔知搵邊個人去賠償。惡佬明話十一月二十三日就投票選區議員，火炭區嘅候選人應該為居民行車安全着想，應該查明呢件火炭行車陷阱！