美股周三微跌18點，港股噚日就急挫288點，收報12150，但未有削弱人保財險（2328）首日掛牌表現，在美林力托下，以2.70元收市，超過傳聞中的2.50元暗盤價水平，較招股價1.80元高50%，成交額達42.3億元，佔大市總成交逾20%。
由於今次人保財險公開超購135倍，搞到30億股中，有一半落入散戶手上，扣埋AIG買起大約10億股，基金在國際配售部份中，只分得5億股，搞到唔少基金都要入市搶貨。
Cookie話，以噚日市場情況嚟睇，基金大戶好快就會從散戶手中收乾人保財險，對沖基金亦可能趁呢一段時間將股價繼續挾高，後市可能會升破3元水平。不過，由於中國人壽會上市，而招股集資金額可能高達25億美元，國內保險股供應將大幅增加，最終為人保財險帶來壓力，所以要提防股價會快上快落。
安徽海螺（914）配股集資近6億元，引起市場憂慮H股會出現配股集資潮，國企指數跌1.4%，收3794。有投資銀行老友向阿虎訴苦，其實大家應該希望多啲國企肯在香港配售H股，如果國企番晒家鄉發A股，外資就唔會流入港股，港股就會變成一潭死水，何況現時H股仍遠比A股平，現價持有H股，將來肯定有着數，現時好多外資增持H股，都係炒H股同A股接軌。
升岡（485）股份將4合1。據聞，公司在公布完中期業績後就會進行路演，吸引外資基金入股。不過，以昨日升岡收市價0.315元計，合咗股只係1.26元，未夠１蚊美金，幾難吸引到外資。
阿 虎