家陣邊間歐洲大球會嘅教練最有機會俾人炒魷魚？計我求大俠話，一定係德甲聯拜仁慕尼黑教練希斯菲特。
係人都知拜仁今屆將目標定得好高，誓要攞到歐冠盃同德甲聯。但係，佢哋前晚喺歐冠盃分組賽主場輸畀里昂後，隨時好似上屆咁再喺首圈出局；至於喺德甲聯，佢哋亦表現麻麻，𠵱家排第五位，落後榜首史特加成六分咁多。而佢哋近兩屆使咁多錢簽啲世界級球員返嚟，但就踢成咁，你話佢哋教練希斯菲特唔驚就假。
嚟緊一個月對希斯菲特可謂非常重要，如果佢唔能夠令球隊晉身歐冠盃次圈同埋返上德甲聯賽榜頭三位，睇怕未到聖誕節，佢就會收到拜仁高層送畀佢嘅聖誕禮物──大信封。
尼日利亞足總由於財困關係，宣布放棄請英格蘭名宿白賴仁笠臣做佢哋國家隊教練。其實笠臣都好醒目，要求尼足總先畀三個月人工（約一百一十萬港元），但因為尼足總搵唔到贊助，於是合作計劃惟有告吹。雖然笠臣要返失業大軍行列，不過總好過喺出咗力後收唔到錢。
阿當斯啱啱先做英乙聯球會韋甘比領隊，但博彩公司就開出佢喺將來成為阿仙奴領隊嘅賠率，重熱到得三倍。雖則話雲格𠵱家喺阿仙奴地位穩如泰山，但遲早會離隊，而阿當斯本身喺阿仙奴出身，受球迷、球員同高層嘅歡迎同支持，所以絕對有可能返阿仙奴教波。
熱刺「黑仔」薛基膝部受傷，亦證實要到新年期間至可以復出，對呢位德國老將，傷完又傷，都算係大考驗。不過，薛基話好有信心傷愈後，重返球場會有好表現。我求大俠都祝佢如願以償，話晒佢足球生涯開始步入黃昏期，有機會作最後衝刺，都總好過無奈掛靴。
利比亞狂人卡達菲個仔薩迪卡達菲，想話喺意甲開拓足球事業，但就波折重重，佩魯賈成績欠佳外，意大利奧委會日前宣布，薩迪卡達菲係上個月初對里賈納賽後藥檢報告中，發現禁藥諾龍指數超標，正受到進一步調查。不過，佢坐後備席，冇出場，咁都中招，都算黑仔！