港股自升上萬二大關後，走勢已變得極度波動，繼上月23日大跌逾500點後，噚日歷史又重演，在外圍日股大跌拖累下，恒指一度急挫378點，尾市略為反彈，結果收12150，仍跌288點，期指則低水60點。人保財險（2328）掛牌，成為熱炒對象，成交42億元，令大市總成交大增到199億元。
人保冧巴夠正，易生易發，申請者個個發筆小橫財，笑逐顏開。人保1.8元上市，開市價已搶上2.425元，買盤前仆後繼，最高掃到2.725元，收市2.7元，比上市價高出50%！噚日買盤主力係幾家大行，尾段在高位仍幾十球掛入，聽芬佬講，短期有機會見3字頭。
上個禮拜掛牌的中航科工（2357），雖逢大跌市，但承接力仍好強，收1.55元，僅跌2仙。中航科工上市後曾見1.67元，之後出現調整，前後已3日，形成上升三角形，1.6元係短期阻力，破位而上，升浪再起，目標指向2字頭。
人保上市，令新股熱潮火上加油，中航科工發售價1.21元，以噚日收市價計，升幅僅28%，遠遠落後人保的50%，相信會吸引部份從人保套現的資金流入，若人保股價一如芬佬所料，升上3元大關，則中航科工從後趕上之勢亦會更急，係最佳的短線投機對象。
安徽海螺（914）做「披成」，貨源9成落入基金手中，股價雖曾低見8元，但好快就上番高位，收8.85元，微跌5仙，成交4800萬元，又係基金買晒。海螺新股未登場，但股價表現咁強，對國企有好大支持作用，所以，噚日個市雖然大跌，好多國企都只係回軟一兩個位，手持重貨嘅基金，仍然好有信心。短線選股，上海石化（338）、江西銅業（358）同馬鋼（323）可優先考慮。
另外，中國（香港）石油（135）在高位整固咗3日，成交已縮到5300萬股，比創出1.2元高位之日的3.42億股，已大減84%，隨時可發力而上，只要一衝破1.12元阻力，照度上去，上升目標起碼可見1.47元，可在其破位時追入，短線有機會賺3成。
郭兆誠