噚日係金管局高層定期到立法會滙報嘅日子，以往曾出現任總同卿姐互片場面，但噚日出奇地平靜，主要係外滙基金投資收益大增，財政儲備分帳逾一百七十億元，令總裁任志剛大把彈藥在手，議員要暫避鋒頭。職工盟議員李卓人都話任總「冇做敗家仔」，既然冇敗家，「劉議員（指劉慧卿）都冇理由問佢人工」。
金管局即將喬遷到國金二期，雖然卿姐仍不忿任志剛做「包租公」（金管局將購置嘅非自用物業出租畀其他機構），但都冇發炮。
卿姐放過任志剛，但就轉為同馬時亨交手，話說卿姐覺得𠵱家香港唔係好多人肯犧牲時間，做上市公司獨立非執行董事，質問政府有冇理？馬局長即刻搭嘴，話卿姐梗係冇睇佢上個月篇處女作文章，篇文建議搵啲退休律師同會計師幫吓手。
卿姐見呢個題目馬局長還拖，再問一個問題，就係話公司法改革全面檢討究意幾時做？下個月做得唔得？馬局長即時被拋窒，好彩苗學禮幫佢頂住，話冇咁快，出年第一季先啦，馬局長才逃過一劫。
傳真︰2623-9278
電郵︰