消費BestBuy：掃定貨襯秋裝<br>歐洲女裝皮鞋2折開倉消費BestBuy：掃定貨襯秋裝
歐洲女裝皮鞋2折開倉
各位靚女，轉季掃貨已好一段日子，有無發覺一直以來只顧掃上身衣飾，忽略咗一雙美腿呢？上身着得幾靚都好，無對似樣嘅鞋等於白費工夫，今日起新世界中心歐洲女裝鞋2折開倉，牌子包括Elle、GiancarloPaoli、HushPuppies、Vaho等等，最平$190有交易，走一轉入多幾對襯衫，就唔怕畀人笑你觀音頭掃把腳喇。
記者：黃婉冰
攝影：陳陶鈞
模特兒：Teddy
返工揀番對有踭鞋
朝九晚五OL，一身行政制服，無番對有踭鞋點見人？今次開倉，真皮高踭鞋佔多數，款式多，總有一對啱你心水。
車線啡皮簡約成熟
（開倉價：$190 原價：$790）
經常見客，最起碼都要有番對大方得體嘅高踭鞋，呢款淨色車線，勝在穩穩陣陣，唔太花巧，成熟斯文，係襯返工套裝嘅百搭款式。
窩釘駁皮輕便斯文
（開倉價：$290 原價：$1,590）
踢拖無分季節，拖鞋勝在輕便，鞋帶都懶綁，平時着固然掂，襪都唔着又可以即刻着返工，所以備受歡迎，就好似呢對意大利款式矮踭拖鞋，將兩種不同色調嘅深淺墨綠皮駁成鞋面，加上銅色窩釘，斯文帶硬朗，Casuallook定返工Look任你配搭。
尖頭軟滑馬尾毛
（開倉價：$190 原價：$590）
鍾情簡單別致嘅鞋款，不妨先考慮Rosso呢對馬尾毛高踭尖頭鞋，全淨色馬尾毛質地軟滑，用深啡色皮帶扣配襯，清簡大方，另有深啡色選擇。
窩釘扣帶有驚喜
（開倉價：$190 原價：$790）
雖然話淨色易襯衫，但完全無款又未免流於單調，好似呢對尖頭淨色，喺鞋帶上面加幾粒窩釘做裝飾，平凡中見驚喜，襯衫一樣咁易。
鞋踭綁蝴蝶結
（開倉價：$190 原價：$590）
玩花巧，唔一定要喺鞋面，Elle就喺鞋踭花心思，鞋踭綁上同色絲帶蝴蝶，前後睇兩種Style，鍾意嘅話又可以拆低蝴蝶結，設計頗特別。
冬日皮靴大晒冷
一到冬天，「靴」聲四起，出街着乜都必襯一對皮靴，事實皮靴既可保暖，又易襯衫，簡單一條老牛已經襯到絕。
紅色綁帶最搶眼
（開倉價：$250 原價：$790）
秋冬衣飾多以沉色為主，偶爾穿回鮮色，感覺會較新鮮，好似呢對綁帶高爭鞋，款式雖普通，但勝在顏色夠搶，在眾多深沉色系中必會突圍而出。
鴛鴦色襯Suit至啱
（開倉價：$190 原價：$790）
露腳踭鞋，OL另一最佳之選，深啡襯杏色，幾乎已經係秋冬季必有嘅色系配襯，買番對襯Suit，擔保唔會入錯貨。
中筒靴必襯老牛
（開倉價：$250 原價：$1,250）
自問不是高妹，自知未夠班學人着高筒牛仔靴，咁不如改着中筒款，好以呢款啡色牛皮平底靴，襯牛仔褲絕對有型有格，另有黑色選擇。
矮踭馬靴襯馬褲
（開倉價：$290 原價：$1,290）
曾幾何時興着馬褲襯馬靴，呢款帶有馬靴影子嘅深啡色高Boot，勝在唔花巧夠簡單，另有黑色同無扣款式任揀，但切記，自己知自己事，小腿過粗就咪着喇。
麖皮中筒靴最襟興
（開倉價：$290 原價：$850）
講襟興，又點少得麖皮靴？特別係杏色款，年年都實有捧場客，HushPuppies呢對大路款，鞋邊有羊毛做裝飾，襯牛仔裙一流。
夠Raw方頭短Boot
（開倉價：$190 原價：$850）近排興玩殘舊Feel，要食正個Trend，咁就快手執番對殘舊皮靴，自製殘舊效果加上方頭設計，皮料軟熟，似足阿媽年代皮Boot，玩埋懷舊Look都重得。
另類之選
高踭鞋總畀人拘謹嘅感覺，想着得Casual啲兼有型有格，不妨考慮以下3款大玩鞋面、顏色或者Pattern嘅高踭鞋。
塗鴉玩嘢之作
（開倉價：$190 原價：$590）
鞋面填滿塗鴉Pattern，Elle呢款圓頭平底鞋算係少有嘅玩嘢之作，鞋款簡單，齋玩顏色Pattern，望落唔會太過誇張，襯條貼身窄腳褲效果不俗。
歐洲名牌貴鞋開倉資料
地點：尖沙嘴新世界中心地庫
日期：即日起至11月16日
時間：11:30am至8:00pm
電話：24221268
付款方法：只收現金
高踭鞋玩波鞋面
（開倉價：$290 原價：$1,690）
將波鞋元素加入高踭鞋，設計夠晒突破，鞋面玩綁帶似波鞋，但尖頭高踭，外形依然保持高踭鞋應有嘅高貴元素，要斯文一樣得。
珍珠金帆船款
（開倉價：$250 原價：$990）
玩完波鞋款，呢對玩帆船鞋款，鞋側有皮帶穿插點綴，但珍珠金色似乎略為老成咗啲。