SONY呢邊廂超靚嘅AV產品PSX蓄勢待發，另一邊SCE又推出新色機殼PS2打對台。新嘅PS2套裝名為RacingPack，因為跟機附有12月4日推出嘅PS2重頭作《GT4：序章》一隻，而機身就首度配上陶瓷白，即係類似蘋果小白iBook嗰款色，比之前嘅白色透明版PS2更為吸引，而且全套機連手掣、8MB記憶卡同直立企座都係同一隻色，放喺廳度肯定搶晒視線焦點，臨近聖誕送畀情人肯定非常受落。PS2RacingPack預定12月18日推出行貨，賣價$1,550，比目前淨機價只係多$70，以賣相同價錢計，到時肯定極之搶手。
順帶一提，12月24日至28日舉行的「亞洲遊戲展2003」即場亦會發售PS2RacingPack，而且重有額外限定版贈品㖭，詳情請留意《爆機狂迷》嘅報道。
記者：徐影龍