小初記得,上個月大市勁跌501點當日,品題過兩隻跌市奇葩,一隻係日東科技(365),另一隻係科建集團(563)。
噚日恒指勁跌288點,呢兩隻股份又再逆市上升,最矚目係科建,股價在急升20.46%之餘,重有1182萬元大成交配合,一改之前乾升的情況。
科建噚日又創52周新高,收0.53元。經紀陳話,正如早前提過,新大股東入主後,將一啲唔想留低嘅資產賣出,重整業務;上個月底重連成個董事局都大換班,重整工作已經七七八八,相信距離正式做嘢之日不遠。
科建新主入主之後,公司會有乜嘢新發展呢?經紀陳話,據講都係搞基建一類既投資,但有幾正則要稍後先知。
另外,大廚隻大華國際(600),早前傳話有搞作,但仍然只見身郁唔見米白。經紀陳話,聽聞好似因為未講掂數之故。
隻股雖然已炒咗一段日子,股價亦升咗好多,但成交一直唔大,分分鐘係幕後重玩緊搓波仔,啲貨仍然未散得出。
慕容小初