香港近年興起一股戴帽熱潮，無論春夏秋冬都可見到不少男藝人冷帽不離頭，其中謝霆鋒與麥浚龍都是表表者。而鄭中基則表示戴冷帽有型襟興，不過就提醒扁面與頭形短的人不宜盲目跟風。
近日天氣開始轉涼，戴上一頂冷帽除有型外，還可保頭皮暖笠笠，對藝人而言，則可省卻set頭時間，隨手戴上便可出門，男藝人謝霆鋒、余文樂、麥浚龍及鄭中基等，都是冷帽的支持者。
麥浚龍則天生一副長面形，戴上冷帽後即可遮去三分一臉，所以他連夏天也離不開冷帽，更在日本原宿買入不少心頭好。Juno日前說：「我入行前已經好鍾意戴帽，又舒服又易打理嘛，而且易襯衫，我買帽唔一定要有牌子，顏色同個款啱就得。」
另一位冷帽擁躉鄭中基則自言平日極少吹頭，所以很多時也需要一帽傍身，他說：「整頭化妝需要好多時間，免得過就免，慳番好多錢㗎！有時出門自己係咁意吹下頭就走，不過難免有時啲頭髮重亂過飛鵝山啲草，嗰陣就要靠帽嚟救命。」不過基於面形所限，鄭中基表示他只會戴冷帽及鴨舌帽，他說：「冷帽易襯衫又好睇，我最鍾意，啲款襟興唔易out，幾乎乜衫都襯得，買一頂可以戴十年。但我戴賊仔帽真係會好似賊仔，所以係大忌，恐防出街俾差佬𢭃嘛。」
鄭中基又提醒大家買帽一定要試戴，否則很易出事，他說：「塊面極扁嘅人好難搵到啱戴嘅冷帽，頭短都唔戴得，如果唔係連下巴都遮埋，睇唔到路好危險㗎！不過其實冷帽係最唔蝦人戴嘅帽，我諗都好難搵到超扁面同頭極短嘅人。」
採訪：李珮洳、蔡如育
