古天樂自從拍嗰套《豪情》扮過鹹書大亨之後，聽講佢有興趣自己投資出版旅遊雜誌，一於進軍埋出版事業，本雜誌好似係免費派發，靠廣告嚟維持成本，佢重喺壹傳媒撬人幫佢搞書㖭。
馮仁昭覺得啲藝人幾奇怪，做得咁上下就要做吓生意，搵地方蝕啲錢先安樂。環顧呢個圈咁耐，真係冇見過邊啲紅藝人投資生意唔係蝕本收場。古仔做生意，馮仁昭都唔睇好，因佢個人咁心軟同優柔寡斷，拍戲工作又咁忙，根本冇咁多時間去睇住盤生意，再加上𠵱家經濟環境咁差，搞出版事業真係唔容易，不過佢咁勇，我都希望佢可以殺出血路嘅！
聽講古仔最近重接咗個加拿大電訊廣告，個廣告會喺加拿大播嘅。知唔知個老闆點解揀古仔呢？老闆話睇中古仔年輕兼靚仔，個價錢又收得好合理，可以幫佢哋開拓加拿大嘅年輕人市場。另外，電訊公司重搵咗個混血模特兒同古仔拍廣告㖭，佢兩個都覺得同對方好襯喎！
早前賭王何鴻燊大爆個女超儀會先去澳洲舉行婚宴，然後再返香港，學佢家姐超瓊咁喺君悅連擺三晚，馮仁昭收到料，呢篇報道原來啱唔晒，因為正確係超儀同子聰喺二十九號晚喺君悅嘅JJDisco搞個熱鬧派對，請嘅都係娛樂圈中人，長輩呢就擇日再食一餐咁話。不過無所謂啦，都係要開開心心啫！
李心潔為即將舉行嘅台灣金馬獎出錢出力，佢重答應為大會拍攝宣傳片，邀請咗師傅張艾嘉為呢段宣傳短片撰寫劇本。李心潔又話自己同彭順嘅感情發展順利，佢話：「我手上其中一隻戒指是男友送的，我們感情很好，但仍未有結婚計劃。若我結婚絕對不會偷偷結婚，一定會辦個盛大的派對。」其實李心潔同彭順拍拖咁耐旺咁耐，都咪話唔順啦！
萬人迷木村拓哉拍《2046》，當然被日本傳媒昅到實，所以佢早兩日喺上海出席記招，日本報紙雜誌都大事報道，除咗讚木村着到鬼咁有型外，重讚王家衛係「鬼才」。其中一啲套戲嘅劇照，亦喺日本方面首先曝光，聽聞木村飾演嘅係一個穿梭過去與未來嘅「timetraveller」，唔知係咪因為咁佢要留羊咩鬚呢，有啲流浪嘅feel呀？
內地女星劉曉慶出獄之後好快又投入拍戲，今個月一號開始，佢喺杭州嘅影視城拍《永樂英雄》，等咗佢好幾日嘅記者一見一身古裝打扮嘅佢由保母車行出嚟，就想同劉曉慶傾幾句，但佢似乎好緊張，即刻抽住條裙走入片場。聽聞佢成日匿喺旅館，唔係睇劇本就做健身，嘢都唔多願食喎，小心悶病自己呀！
港台二台節目總監李再唐同港台高層周國豐，噚日喺尖沙嘴見記者，問到佢哋四台聯頒搞成點，李再唐話：「每個台嘅機制都唔同，但港台最好係冇商業壓力，我哋唔使營運，亦唔怕直接影響收入。」馮仁昭覺得李再唐言下之意似暗寸商台同新城嘅頒獎禮好商業味。周國豐話港台年底嘅頒獎禮，初步好想搵幾米畫畫揭開金曲名單，如果係都幾特別。
