法資大經紀百富勤每年都會揀一個大陸城市，開大型研討會，今年揀成都，方便開完會去九寨溝同西藏玩。由於近月國企股大炒特炒，所以去成都捧百富勤場嘅基金經理特別多，而百富勤亦好識做，喺會議中場休息時，安排麵粉公仔檔、四川小食檔等等娛賓，重有四套少數民族舞蹈表演，花花綠綠，重熱鬧過維港匯，有得食，又可以飽眼福，班基金佬一定happy到暈，諗點解重會以香港為基地？
八方記得舊年百富勤喺青島開呢個會，開場騷搵咗波斯登做羽絨時裝表演，今次重特別，喺武侯祠（即係諸葛亮嗰座廟）搞開幕晚宴，有變臉睇，百富勤更特登呼籲與會者着紅衫出席，實行炒個滿堂紅大家過肥年。
傳真︰2623-9278
電郵︰