近排新聞多多嘅陳小春，噚日凌晨三點幾喺灣仔盧押道一帶嘅酒吧附近，同個洋漢起爭執，兩個人拗到火紅火熱，重爭啲搞到打交收場㖭。
話說嗰位同小春拗交嘅外籍人士，本來同佢個泰籍女友喺灣仔嘅酒吧消遣，但個洋漢飲醉酒，喺吧內猛咁撩女仔，搞到女朋友扯晒火，佢哋兩個就由酒吧入面嗌交嗌到酒吧出面，小春啱啱揸住架綿羊仔經過，但個洋漢竟然無端端用英文粗口鬧小春！
小春雖然戴住頭盔，但佢都聽見洋漢鬧佢，佢立即停低架綿羊仔，衝埋個洋漢度同佢理論，點知個洋漢重不停咁鬧，小春就火起，嬲到成個《古惑仔》入面山雞咁款，其間重有人想動武，好彩圍觀嘅途人將佢哋拉開。小春後來執番架綿羊仔想走，但架車撻唔着，所以就坐的士離開，佢都算黑仔咯！
小春所屬嘅中國星經理人部門發言人李小姐話，噚日小春係同個洋漢有拗撬，但小春知道對方飲醉酒，所以冇計較。不過馮仁昭就覺得小春雖則無辜，但佢始終都係公眾人物，當街同人嗌交就點都蝕底，所以佢都應該收斂一下自己嘅脾氣，唔好太火爆。
靚女組合2R早排喺塞班島拍攝處女寫真集，今次家姐Rosanne同細妹Race唔單止會以水着亮相，而且重由佢哋嘅爹哋做埋攝影師㖭，而2R嘅細妹亦有去到，專責做兩位家姐嘅妹仔，幫佢哋擔遮同執頭執尾。
有次2R喺嗰度嘅懸崖邊取景，兩姊妹驚到呱呱大叫，Race更加係拖住家姐隻手
謝霆鋒噚日喺商台做訪問，近日傳佢契姐梅艷芳病重，問到霆鋒係咪有件咁嘅事？霆鋒話：「我唔覺得佢病重，總之佢嘅演唱會一定會好好睇。」另外，霆鋒同祖兒喺《維港巨星匯》做咗犧牲品，每人只可以唱十五分鐘，霆鋒就話就算佢得三十秒，都會照唱，唔通霆鋒真係咁鍾意唱歌，連幾十秒嘅表演時間都一於唔放過？
彭丹喺新疆拍新劇嘅一場騎馬戲時，因為墮馬而整傷咗大髀內側，噚日彭丹喺電話度話大髀內側已經唔痛，但檢查後就發現腰骨生咗骨刺，要留喺美國醫成個月，彭丹話今次可能要成幾十萬蚊醫療費㖭，不過彭丹就強調絕唔會因傷而告別娛樂圈。馮仁昭心諗，丹姐應該醫好個傷先算，唔係個傷唔好，就好難再表演到一字馬！
盧巧音（Candy）噚日去到新城接受訪問，透露自己張新唱片嘅封面相係一件好薄嘅deepV白色短裙，所以佢影嗰日要戴個隱形胸圍。問到佢會唔會喺宣傳時都着得咁性感，Candy就好搞笑咁話：「你估我係Juno（麥浚龍）咩？佢冬天就着夏天衫，夏天時又着冬天衫！」馮仁昭都覺得奇怪，Juno大熱天時重着住冷衫出席活動，唔通佢啲衫係有內置冷氣嘅？
