無綫一班花旦昨日為台慶排舞，廖碧兒自言是黎姿的fans，弄得黎姿一臉尷尬地說：「講到我咁老！」而湯盈盈和姚瑩瑩則以高難度舞姿搶盡風頭。
陳百祥（阿叻）昨日聯同陳慧珊、黎姿、廖碧兒、滕麗名、利嘉兒、湯盈盈和姚瑩瑩，以一男七女陣容在《萬千星輝賀台慶》中大跳搖滾舞步。昨日眾人在將軍澳電視廣播城排舞，湯盈盈和姚瑩瑩更以高難度舞姿搶盡風頭。
湯盈盈被拍檔郭卓樺抱起，如人肉摩天輪般翻筋斗；姚瑩瑩除了被拍檔蘇敏聰抱起外，更把頭靠在男方的胯下，意識大膽。
而鬼妹仔性格的廖碧兒昨日一見黎姿，即如小影迷般興奮地捉着黎姿雙手說：「好開心見到你，我好鍾意睇你做戲，估唔到你𠵱家重可以咁有氣質。」
現年三十二歲的黎姿被廖碧兒這番話弄得一臉尷尬，她說：「講到我咁老，佢話係我fans，我真係好驚㗎，我都係啱啱入TVB。」
另外，鄭裕玲（嘟嘟）今年台慶將會以三套晚裝，配襯四套由伯爵表贊助、價值逾二千萬的戒指、耳環、手表、手鈪等共十三件首飾。
而陳慧珊表示今次將會模仿電影《油脂》大跳五、六十年代流行的舞步。問到其好友洪欣公開承認與比她年輕七年的郭力恆拍拖時，陳慧珊表示亦戥好友開心，她說：「郭力恆係好男仔，我哋之前食過幾次飯，見佢好照顧洪欣同佢囝囝，囝囝都好鍾意佢，我覺得年紀細過女方都唔係問題，最緊要係思想成熟。」
此外，阿叻早前穿三角泳褲做港姐司儀，遭市民致電廣管局投訴，為免嚇怕觀眾，阿叻表示已購買大批歐洲時裝，他說：「今次唔會着泳褲，冇機會畀鄭大班『吠』我！」
採訪：卓美娟
攝影：陳慧安
