區議會選舉拉票活動，除咗洗樓派傳單，重有就係選舉論壇，不過今次區選選情最激烈嘅港島觀龍區，兩位立法會議員葉國謙同何秀蘭就為選舉論壇鬧出一場風波。
無綫原本睇準呢區選情激烈，舉辦選舉論壇邀請兩位候選人喺鏡頭前互片，點知阿謙唔肯玩，令一心喺論壇上狂攻對手嘅何秀蘭非常無癮，上星期更親自向阿謙下戰書，請佢重新考慮參加。
直到前晚，大律師余若薇陪何秀蘭去觀龍洗樓，同葉國謙狹路相逢，講起論壇一事阿謙仍然堅拒出席。
何秀蘭一怒之下，噚日公開咗封戰書，投訴阿謙逃避向居民回答問題，阿謙坦言，佢正係唔想增加對手嘅曝光機會，而且論壇只係雙方你砌我，我砌你，浪費時間，面對阿謙高掛免戰牌，何秀蘭最終都無可奈何。
傳真︰2623-9278
電郵︰