港股噚日在12400水平反覆上落，其後跌幅收窄至1點，收報12438，成交縮至131億元。澳洲央行宣布加息，更加確認全球經濟正在復甦，只要歐美加息步伐唔太急，資金會繼續留在股票市場。
駿威汽車（203）近期升勢如虹，市場除咗炒佢可以取代上實（363）做藍籌股之外，其實亦因為旗下廣州汽車集團將有好消息公布，就係計劃與日本豐田在國內設合資廠，生產豐田車系。廣州汽車集團本身已與日本本田合資生產汽車，換言之駿威手上將有兩個重要日本汽車品牌，可以擴大市場份額。駿威可能因為新合資計劃而在市場抽水，向廣州汽車集團注資。
恒鋒集團（185）老細噚日喺招呼記者飯局時話，要成為1間擁有30億元資產的公司，即較3月底時的總資產5.68億元增長4.3倍。至於該公司有乜方法增加資產值，阿虎就唔係好清楚，不過股價就應聲勁升30%至5.95元。由於恒鋒股份將1拆25，以噚日收市價計，即每股拆細至0.238元，到時細細粒容易炒，唔覺唔覺就可以將股價炒高一兩倍，到時要谷高市值，肯定比谷大公司資產值升到30億元更容易。黑客都話此股會炒，但可惜成交唔活躍，好難吸引到投資者跟進。
日本軟庫終於宣布沽清軟庫發展（648），而長和系亦減持至不再成為主要股東，結果軟庫變咗同滙豐（005）一樣，並無主要股東嘅上市公司。Cookie話，前日成交2.43億元，如果冇大孖沙接貨，真係講都冇人信，估計有關人士仍在收集中，暫時唔想蒲頭住。
阿 虎