個市大反覆，恒指埋單計，好友冇贏，淡友冇輸。先兩日推介嘅恒生Call輪9162，彈升14%，有貨嘅揸落去，冇貨嘅吼低買。噚日推介嘅長實Call輪9065，微跌1仙，收80仙，跑贏正股（001）。正股跌50仙，其他3隻大隻地產股隻隻都有進帳，長實遲早上番去，9065唔會冇表現。
今日新推介9659同9086。
9659係聯想Call輪，昨日低收69仙，急跌14%，因為正股（992）由3.75元散落3.55元。海螺（914）上晝收市後搞配股，一啲紅籌國企唔知乜頭乜路受到沽售。聯想做產銷電腦，𠵱家啱啱食正換機同新購潮。上一次電腦銷售熱潮，喺4年前，𠵱家批機變老爺貨，要更替，聯想產品銷量大增可以斷言。9659呢個幾月交投大盛，有波幅，啱短炒，博反彈，而數據亦算靚。下月夠鐘，溢價0.6%，槓桿率5.1倍，上番先幾日高位，已經可以執23%。雖近末日，亦唔怕炒，因為溢價幾乎冇晒，買賣又易。
9086係九倉Call輪，收41仙，升2格。九倉（004）上月22元，𠵱家20.35元，單日升20仙。自由行進一步放寬，九倉旗下商場多，係受惠成員。9086明年11月到期，7%溢價唔貴，5倍槓桿率唔算細，上月高位52仙，有水位。
章 盛