啱啱推出全新大碟嘅英國人氣男子組合Blue，可謂今時唔同往日，佢哋首新歌《Guilty》嘅MV特登去到布拉格取景，畫面充滿吳宇森招牌慢動作加《22世紀殺人網絡》嘅墟冚場面，而呢首歌重係隊員Duncan特登寫畀女友，令佢成功箍煲！
Blue呢個MV可算超級大陣仗，唔單止請到曾經幫史汀（Sting）同佐治米高（GeorgeMichael）拍MV嘅名導演HowardGreenhalgh操刀，MV入面嘅舞蹈員、臨記同幕後工作人員加加埋埋重超過一百人，單係人工都有排計！
我羅拉睇過Blue嘅MV，入面有唔少古董車、直升機同爆炸場面，好似走難咁款，部份情節又撈埋吳宇森招牌慢動作特技效果，重有成棚人互相追逐同吹到上天，整體感覺真係有幾分似《22世紀》。
《Guilty》呢首歌以成員Duncan同女友Enya為創作背景，話說佢兩個分手後，間中仍然會約埋成班朋友一齊出去玩，有一次Enya對Duncan話：「我覺得每次同你出去，都會令我感到好Guilty（內疚），因為我覺得對唔住𠵱家個男友。」Duncan知道Enya對佢重有感覺，於是寫咗呢首歌畀Enya聽，最終破鏡重圓！