沙田馬場跑婦女銀袋賽，上星期日舉行，馬迷十一點鐘開始入場，未夠十點半，住響駿景園，望馬場公眾棚入口好清楚嘅沙田陳太已經打電話嚟通知：「喂，有好多人等入場，眼睇有成近千人，做乜事咁緊張呀？」於是話畀陳太聽是日入場有襟針、楊利偉海報送。陳太話：「唔怪得啦，如果你遲啲入場，怕派完咯。」
左丁山經驗豐富，早知逢係有「婦女銀袋」，就會吸引大批平時唔到馬場、唔識賭馬嘅女士入場，所以一定提早出門，未夠十二點就殺到馬場，襟針當然攞到，不過毫無用處，唔知愛嚟做乜。至於太空人海報咯喎，原來要填表排隊先至有，條人龍打晒蛇餅，以女士居多，真係咪搞我咯，慳番啲時間用嚟刨馬好過，日前睇陶傑寫「搶包山」心態，亦反映於每年婦女銀袋賽日攞禮物，諗諗吓，市場推廣人士應該深入研究「搶包山」行為，勝過讀市場學一○一。
星期一睇《南華早報》，一幅相係楊利偉舉起左手向群眾示意，左手手指尾零零舍舍凸出一塊指甲。
最初不以為意。點知再睇《信報》，劉健威專欄「此時此刻」話：「某報周日頭版大頁彩印，最接近鏡頭的是楊利偉的右手，清晰可見的是，四指的指甲是修齊了，唯獨指尾，指甲留得長長的，作用不言而喻。」劉健威睇到右手指尾，左丁山睇到左手指尾。手指尾留指甲，似乎係好多中國人嘅習慣，有何文化意義，要睇番以前陶傑寫過嘅一篇手指尾指甲專論！