十一月雖未至於凍至牙關打震，但已足夠大條道理吃一頓熱騰騰的火鍋，愈來愈多人喜歡吃火鍋時食牛肉粒，要吃一流的牛肉粒，背後的買手專員花了不少時間和精神，走勻七個街市為的只是入口豐腴的牛肉粒，叫客人吃得開開心心。
記者：馬靜兒
攝影：梁細權、伍慶泉
一星期至少食三至四次火鍋的Andy，是個不折不扣火鍋癡，因為太愛火鍋，所以五年前加入這行，開始他的火鍋生涯。為了買到最新鮮、最好的火鍋料，他每日奔走於港九七個街市，由西環、上環、旺角、深水埗、紅磡到荃灣楊屋道街市都是重點搜索範圍。
「每日去街市買貨都好似打仗，要和其他買手爭靚牛肉。買牛肉都要講情，唔係有錢就大晒！」Andy自言有時為了買靚牛肉好勞氣，因為牛肉的質素不能控制得宜，五豐行賣完一批牛才會推出第二批，就算想買靚的都不一定買到。
很多火鍋店減價，但Andy堅持不減分毫。「我的火鍋料樣樣都靚，同嗰啲幾十蚊任食火鍋完全不同，點解要減價，食就食，唔鍾意就算！」食火鍋很多人都會喜歡食牛肉粒，Andy就教我牛肉粒點先算靚。「一定要用肥牛的牛腩坑，雪凍後花紋就會現身，用人手切就是至靚的牛肉粒。」
牛肉粒$90：用牛腩坑的肉，雪花紋的脂肪夾雜牛肉粒，灼一分鐘至半生熟就食得，但愈灼只會愈腍，入口鬆化甘香。（a）
豬黃喉$48（前右）：豬黃喉是豬心的大動脈，每隻豬只有一呎長的豬黃喉，灼一灼，入口爽脆。
豬天梯$48（後左）：即豬的上顎，形狀如樓梯，故叫豬天梯，咬落極爽。
招牌火鍋$68（後）：以番茄、雞腳、鹹酸菜等十多種配料做成火鍋湯底，惹味非常。（a）
烏魚扣$68（後）?田雞扣$58：魚扣即魚的胃，一條魚只有一個扣，一碟就用上五十個魚扣，即是有五十條魚，叫魚檔留貨先會有，咬落爽口有濃郁魚味。（a）
店舖資料
（a）火井四季火鍋飯店
地址：西環屈地街20號金陵大廈地下
電話：25474508
營業時間：5:00pm-2:00am
收費：不設加一，不收茶、醬料費。
另一火鍋店春秋火鍋，做到加拿大都有分店，砵蘭街的總店更屹立數十年。牛肉粒等火鍋料有幾新鮮，幾好味不用多說，只看熟客無論冬天、夏天都來光顧就知水準一流。除了牛肉粒，足料湯底都是賣點，用鱔魚骨、生魚骨熬出味，再加豬骨再熬半小時，加入葱、蝦米、杞子、紅棗等材料，湯汁呈奶白色，甜到不得了，用來滾牛肉粒，牛肉吸收湯汁的味道，格外鮮甜。
牛肉粒$60：用牛肋骨隙的肉，粒粒呈雪花脂肪紋，入口豐腴。
秘製豬骨湯底$80：用杞子、紅棗、豬骨、粟米、大蒜熬成，骨香其味無窮。（b）
鴨粉腸$45：鴨的輸卵管，新鮮的鴨粉腸呈鮮嫩粉紅色，要用人手「劣」乾淨。灼一會就食得，粉粉哋，味道甘香，不用蘸豉油都已回味無窮。（b）
沙爆魚肚$50：將魚肚用油鑊爆香，吸收了火鍋湯汁特別美味。（b）
鯇魚嘴$60：非常滑溜，含豐富膠質，女士們食了有美容功效。（b）
店舖資料
（b）春秋火鍋
地址：太子砵蘭街396-398號地下
電話：23811728
營業時間：12:00nn-3:00pm；5:30pm-2:00am
