經紀陳早一排鍾情電影股，例如中國星（326）、豐采多媒體（764）同埋寰宇國際（1046），但近排在紅籌國企同埋新股當炒嘅環境下，實在顯得冇乜光采，但電影股就好彩冇大散，表現都算係咁。
經紀陳噚日話，寰宇喺大陸合資搞戲院一事，好似即將落實，可以留意隻股走勢，或者可以跟炒一轉。
寰宇今年投放好多資源拍電影，但票房成績差強人意，早排公布截至今年6月底止全年業績，更加由盈轉虧，錄得虧損2945萬元。
不過，已經講明唔再想沾手工業股嘅金手指，就喺9月份以每股0.13元購入寰宇6.23%，並講明係因為睇好CEPA有利電影股。寰宇若真係北望神州，理論上應該有利未來發展。
寰宇現價0.173元，雖然比金手指入股價升咗唔少，但根據往績，金手指效應唔止咁小兒科，加上寰宇向來貨疏，經過早排供股，貨源就更加疏，所以要炒上亦非太難，其實都有得博。
慕容小初