足智彩向來熱門隊偏向愈買愈熱，噚日清晨，相信好多人捱眼瞓上網睇戰情嘅球迷，都會為全日「起票馬」AC米蘭驚險贏波，拍爛手掌。
可能大家睇賽績，知道佔主場之利嘅比利時布魯日，自從上一輪爆大冷作客贏AC米蘭後，好似中咗咒，喺國內連續兩場輸畀弱旅；所以AC嘅單W由一點八倍去到開賽前落到一點六；濠江嗰邊，讓半球轉半?一低水，成為全日最厲害嘅「起票馬」。
但打到三十幾分鐘，AC先後有馬甸尼受傷同尼斯達被逐，球迷肯定諗住啲錢凍過水；點知卡卡在完場前一箭定江山，呢個𡃁仔幫到球隊重上榜首之餘，又幫到普羅球迷贏到錢，成為「紅黑兵團」內星級偶像之途不遠矣。
皇馬前晚就作客柏迪遜只係同對手打和，都可以率先出線，但唔少捧場球迷就損手。不過，皇馬出線都付出唔少，因為個場草地差，卡洛斯開賽冇耐就拉傷大腿肌肉，肯定缺席今周西甲聯賽之餘，還要退出巴西國家隊。卡洛斯一向係鐵人，柏迪遜個主場真係有殺傷力囉！
被強姦官司纏身嘅NBA球星拜恩，今季去到邊個客場都成眾矢之的，被球迷噓到七彩，但呢位湖人後衞就愈噓愈勁，上場作客太陽啱啱傷愈復出攞咗十五分，前日作客公鹿更加射入全隊最高嘅三十一分，睇嚟湖人嘅敵對擁躉希望分散拜恩嘅專注力都好難，亦證明拜恩喺球場內認真專注啦。
阿仙奴名宿阿當斯喺禮拜三接受韋甘比邀請，成為該支英乙聯球會領隊，重簽約兩年半㖭。阿當斯有好多選擇，佢最終揀咗韋甘比，係因為同曾經喺韋甘比教過、𠵱家教緊些路迪嘅奧尼爾傾過。奧尼爾同佢講要先喺小球會攞經驗，第日先有機會成為頂級領隊。阿當斯甘願由低做起，抵讚！