前日手機場就認真熱鬧，事關有剛曝光嘅索記P900啱啱有水貨派落場，另一邊Phillips530行貨又急急腳派貨，呢兩大新機都各有特色，正所謂貴有貴玩，平有平玩，一時間引嚟唔少人圍觀兼試機。
記者、攝影：劉耀祥
查詢：23987320（鉑匯科技）
地址：九龍旺角先達廣場地下93號舖
香港人幾時都咁幸福，不論歐洲、亞洲定非洲，只要有新機出總會第一時間送嚟香港。今期新鮮滾熱辣嘅就有公布唔夠一個月嘅SonyEricssonP900，雖然只係英文版，但係到港第一日就已經火速炒上近$9,000高位，呢兩日就暫時回落至$7,500左右。不過市道唔好，雖然價錢不斷下滑，但交投量都未算活躍。作為P800後繼機，P900外形輕巧20%，以往脹卜卜如今變成鋼條型。功能方面則新加入拍片及換Theme功能，而P800所有之功能亦當然可繼續在P900身上搵到。據聞行貨價預計只係$5,500，想快人一步就要畀多二千蚊，值唔值得就見仁見智喇。
飛利浦手機以往嘅外形設計都比較成熟，對後生仔吸引力唔係咁大，不過今次新機530就完全脫胎換骨，又螢光又Colorful嘅外殼，重要玩埋全身勁閃，唱K落D想睇唔到都幾難。530有藍、銀、橙同綠4隻顏色，顏色夠Sharp之餘就連Handsfree都襯埋機身顏色，確實花過唔少心思。不過淨係曉閃曉震都唔夠，530內置「BeDJ」程式，用家可自編9聲道和弦音樂，整完重可以用MMSSend畀人。而530亦都係飛利浦首部65,000色彩芒，以及內置收音機手機，聽40和弦重可以聽埋收音機，唔使怕悶。據聞遲啲重會有個外加鏡頭，可以360°扭擰，對後生仔又有一定吸引力。
查詢：27253232（成偉）
