立法會議員開會，一般都好斯文，但噚晚有一條動議辯論，就觸發多位議員神經，一發不可收拾，呢個議員動議係促請政府打擊大陸黑工同非法賣淫，其中賣淫問題，唔知點解引發最多怪論。
麥國風首先發難，大講罪魁禍首係男士們，話如果男士唔使用呢啲「服務」，自然就冇問題，佢重話要教育市民，不如捉到嫖客就通知佢啲家人，一定可收教育之效；胡經昌就提議不如請啲中年失業男士放蛇，一舉兩得，打擊賣淫之餘又可以紓緩失業問題。大嚿陳偉業更語出驚人，話香港再係咁落去，遲早會變「淫賤之都」。
講起呢味嘢，呢兩位大哥嘅口才，始終未及得論斷「凡女人都係雞」嘅詹培忠。肥詹，幾時返立法會呀？
（圖）胡經昌提議請中年失業男士放蛇，既可打擊淫業，又可紓緩失業問題。
傳真︰2623-9278
電郵︰