高科技港、中藥港、環保港，乜都大隻港，特區𠵱家已經變為「醜聞港」；動感之都、盛會之都，不及鑊鑊要善後嘅「調查委員會之都」。
維港水魚大雜滙，無可例外，又成立一個「調查委員會」──有冇人統計過，由路公公干政、居屋短樁，至到沙士維港匯，六年以來，呢個政府成立過嘅「獨立調查委員會」多，定係旺角啲黃色光管招牌多？
大法官人數有限，兼而且自己分分鐘都要聽候獨立調查，全香港計埋馬會、鄉村俱樂部、香港會等各山頭嘅名流，另加立法會，有幾多人可以足夠出任一個個嘅「獨立調查委員會」？
成立調查委員會，又梗係搞到政治化。維港匯醜聞，阿董哋就梗係想捉鼠保唐，但民主派就想唐鼠一齊落鑊。冇錯，一個污糟邋遢嘅廚房，倒瀉咗一地砂糖，就一定會惹老鼠，老鼠偷糖，糖鼠之間，本來就有一種供求嘅共生關係。
唐唐使唔使同埋米老鼠一齊落鑊，係另一個問題，不過自由黨田少，講嘢嘅邏輯就好風趣。佢話，應該按公務員紀律方式嚟處分，不過，若然要問責官員都負埋責要下台，咁以後啲問責高官，就冇人會肯做。
唔知係咪田少喺「七七事變」之後嚇懵咗。放棄高薪、事業，做問責局長，乜唔係需要獻身精神、服務社會咩？年薪四五百萬，銀紙照袋，監督不力，責就唔使孭，全世界有幾多份咁正嘅工？田少開廠，請經理，係咪啲牛仔褲趕唔切，落唔到船，經理都永遠唔使負責，因為一旦炒佢魷魚，以後就冇人敢應徵做呢個位？
田少呢一番咁有周星馳味嘅獨白，證明兩樣嘢：一，阿董嘅所謂問責政府，近親繁殖，唐唐係自由黨始創人之一，做咗財政司司長，冇可能會受到自由黨頭目田少嘅監督，反而因為血緣關係，會多方包庇。
第二，香港嘅小男人多，政治家少，奴才庸才多，人才少，高薪就爭住袋，買車逃稅賺十幾萬佢唔會唔愛，責任一定卸膊，有事就推公務員落鑊，咁嘅社會，唔怪得天怒人怨，連南生圍都出現食人大鱷。
「高官問責制」，一早就已經現出原形，難得田少撲出再解明套畫。維港匯、王見秋、沙士沉冤、西九龍發展工程之亂……高官唔問責，田少證實，六百萬香港人，又俾阿董呃多咗一次，維港匯嘅問責問題，係捉隻米老鼠入米缸，定係「唐氏綜合證」嘅結果？偉哥效應消失，大鱷蒲頭，今次好玩咯。
傳真︰2623-9278
電郵︰