寫字樓市道唔好，發展商為吸納租客各出奇謀，太古地產全新商廈──金鐘太古廣場3座，每層洗手間都花心思添置浴室，租客想獨家擁有呢項設施，好容易，只要承租全層1.6萬呎樓面，每月租金約40萬元就可以！
噚日太古廣場3座平頂，蘭西梗係順便睇埋大廈3樓嘅示範樓層啦，裏面展示咗大廈天花、地台、大堂交樓標準；同附設花灑，供租客冲凉嘅浴室，內設企缸、洗手盆、坐廁等設施。商廈裏面設有浴室畀租客用，唔算好新鮮，但係每層都有，怕者都係香港首次。
除咗呢層現樓示範單位外，發展商重喺太古廣場2座36樓，搞咗個展覽廳，展示太古廣場3座嘅模型，同埋相關資料，睇嚟佢哋為呢幢商廈嘅租務，都做足晒準備工夫。
嘉里喺中半山嘅全新豪宅項目BranksomeII（圖二），最快明年3月招租。嘉里物業代理執行董事朱葉培話，呢個盤有4個特色單位，面積由5000至7500呎，除呎碼夠巨型之外，最特別嘅係每個單位都附連私家泳池，分層豪宅中罕見，格局媲美洋房。
其中頂層面積最大嘅複式單位，面積7500呎，呎碼雖然唔及旗下已經賣出嘅譽皇居8000呎頂層單位，不過，天台多咗個接近標準嘅44呎泳池，賣點反而更加鮮明。
呢批單位嘅租金暫時未有定價，相信可創同區新高；至於其餘60個2600呎左右嘅分層單位，意向呎租35蚊。
新地觀塘創紀之城5期噚日宣布，佔地60萬方呎嘅商場部份命名為APM，個名結合咗「日與夜」（am及pm）。新地代理執行董事雷霆解釋，其實同營商模式有關，日後商場開放時間會延長，零售開至深夜12點，飲食就會到凌晨2點，娛樂更通宵營業。以往觀塘區夜晚都無乜節目，辦公時間過後比較靜局，𠵱家創紀之城5期終於可以打破呢個局面。
雷霆話，商場呎租大約由80至200元；至於面積就比較彈性，最大可以去到1.5萬方呎。另外，寫字樓部份嘅命名權屬於東亞銀行，佢透露，寫字樓已命名為BEATower。
鷹君集團旺角大型商業項目朗豪坊，自9月中宣布，商場正式獲得首個租戶承租後，宣傳攻勢稍作停頓，但今日集團助理董事李澄明，將會與傳媒聚會，講述項目最新部署。有消息指出，短期內大家都會有好多見面機會，睇嚟新一輪宣傳活動即將展開。
較早前集團副主席兼董事總經理羅嘉瑞已經講過，朗豪坊商場部份，今年底前會推出招租；至於寫字樓樓面，就喺明年招租。項目商場樓面達60萬方呎、寫字樓70萬方呎、酒店約46萬方呎，明年落成。
蘭西
電郵地址：