神五升天，帶挈一啲同飛天航空有關嘅股票一齊坐火箭，某份親中報紙高層噚日喺記者會上，一心為小股民攞料，問中國航天科技集團老總張慶偉，中國成功載人升空，對新上市嘅中航科工（2357）股價有乜好處？張總聽完問題，淡淡然咁話，雖然兩間公司個「航」字一樣，但中國航天個「天」字，代表公司搞嘅係上太空嘅超高科技項目，而簡稱中航科工（2357）嘅「中國航空科技工業」個「空」字，級數就差得遠嘞，只係有關民航飛機嘅工業，即係未上到外太空咁高層次。
張總解釋咗一輪「天」同「空」兩個字嘅分別，傳媒高層明唔明就唔知，但小股民就似乎唔理咁多，噚日隻中航科工收市升咗五個仙，即約百分之三，反而真係同中國航天科技集團有關係嘅亞洲衛星（1135）就原地踏步，另一隻衛星股亞太衛星（1045）則跌咗一毫子。
傳真︰2623-9278
電郵︰