昨日推介電盈Call輪9791同恒生Call輪9162。前者見1.36元後打回原形收1.28元；電盈（008）企定5.55元，個勢向上，隻輪可以繼續加碼。後者見54仙後收50仙，仍升9.9%；恒生（011）升1.75元，追落後，現價99.25元，有機上試105元，隻輪有爆炸力，值得逢低加碼。
今日推介兩隻Call輪，9881同9065。
9881係中石油Call輪，大把時間，明年6月到期，輪價70仙，溢價低至1.1%，槓桿率4.1倍。中石油（857）今年上半年多賺1倍，全年盤數肯定唔錯，芬佬長期買入，長升長有，現價2.85元，再升多兩成唔出奇，股神畢菲特唔會亂買。隻輪壽命長，但溢價咁低，係預咗到期前正股會派1次末期息大約7仙，即使計埋股息因素，隻輪都係好抵買，中線睇1元。
9065係長實Call輪，呢排間歇性都有推介。長實（001）近排喺60元至66.50元反覆已有兩個月，波幅唔大。恒指創新高，主力大藍籌遲早逐隻嚟，現價64.50元，遲早上破66.50元，望70元嗰頭。正股睇好，揀Call輪埋手，唔係好多選擇，有粒星或者其他符號嘅特種輪唔係個個啱，標準輪只有9065係正路之選，現價81仙，距兩周前高位1.01元有唔錯水位。
章 盛