美國歌手BritneySpears原定聽日出席喺蘇格蘭舉行嘅MTV歐洲音樂大獎頒獎典禮做頒獎嘉賓,不過近排身體唔多好嘅佢,上星期已取消去歐洲宣傳復出大碟,日前更決定缺席頒獎禮。
聽聞Britney上個星期發高燒,燒到一百零三度。官方發言人話Britney只係發燒同喉嚨痛,不過亦有報道指Britney嘅身體狀況之所以愈來愈差,完全係拜佢私生活唔檢點,又唔注重健康所致。
報道話Britney不但成日煲煙同飲酒,又鍾意蒲夜店到天光。計我大口羅拉話,一個普通人好似Britney咁,都好難有健康嘅身體,佢重係唔少無知少女嘅偶像㖭!真係做壞晒榜樣。
Britney嘅發言人雖然冇話Britney嘅健康狀況同佢嘅爛玩性格有冇關係,但都話:「基本上如果Britney再係咁落去,佢嘅健康會更加差。」不過Britney份人都係衰硬頸唔聽教,佢亦承認自己係個好固執嘅人,重話只會聽前輩麥當娜(Madonna)一個人嘅意見。如果俾Britney阿媽聽到呢番話,唔知會唔會嬲個女,趁佢病踢佢出門口呢?
此外,Britney嘅前度男友JustinTimberlake個女fans早前俾醉酒司機車死,前日嗰個司機被判入獄十八年。