港股連升7日，恒指曾高見12537，收12440，升53點，期指則高水13點。近期升市，主要係由滙豐（005）同中移動（941）帶動，噚日滙豐搶上120.5元後回到平收，開始唞氣，其他大銀行股恒生（011）同東亞（023）則接力而上，唔係靠獨力支撐大局嘅升勢，先至較為健康。
國企大體在高位整固，基金同大行手持重貨，繼續維持秩序，整固後有力再向高位推進。鋼鐵股以重鋼（1053）最強，屢創新高，噚日升上4.2元後回番4.025元收市，僅升一個位，短期可能要停一停，最有機會接力而上嘅係馬鋼（323），要昅實。
中國海洋石油一系大升，中海油（883）直迫16元大關，收15.85元，升0.55元；海油服務（2883）收2.6元，升0.3元，兩股俱創出上市後新高，海油服務可定下止賺位繼續持有。中國（香港）石油（135）經兩日急升後，噚日出現調整，最低1.05元，收1.08元，跌5仙。
上月初，筆者推介中油，當時股價0.85元，理由係基金睇好石油股前景，除股神入股中石油（857）外，中海油、中石化（386）同中油都成為基金大手吸納嘅對象，佢哋買中油，由0.7元買到0.9元，足足買咗5個月，收集完成後，到上周五發動攻勢，兩日之內，就由0.9元升上1.2元，升幅33%。
中油急升後調整，係最佳吸入機會，因為相對同類股份，中油仍然係大落後。過去半年，中石化升幅85%，中石油升78%（相對股神入股價），而中油升幅（相對基金平均入股價0.8元）僅35%！
中油急升，除有炒落後概念外，市場亦有注資同私有化的傳聞，是但一樣，對股價都會有刺激。
其實，中油嘅業績亦好靚，03年度（12月年結）的上半年，營業額11億元，升50.8%，獲3.1億元，升96%，每股盈利6.48仙；下半年油價高企，估計全年盈利6.5億元，每股賺13.7仙，現價PE不足8倍。
中油升後整固，已調整了升幅的50%，並形成旗形，阻力在1.15元，再破位而上，照度上去，目標指向1.45元。
郭兆誠