中國太空人楊利偉訪港，喺各方狂抽水之下，圓滿結束，噚日見傳媒，應對得體、大方，講嘢全無土共式嘅黨八股，真係好難得，阿董嘅「公關」，如具有偉哥嘅十分之一，佢今日就唔會搞到咁慘。
偉哥嘅說話，有啲聽來好似特別有骨，例如佢講：「機會係留給有準備的人的」，呢句金句，阿董同儍強就應該聽吓：沙士瘟疫，明明喺廣東省已經傳播，阿董同儍強領導嘅醫管局，重毫無準備，坐喺處等運到，咁又點有機會？既然連準備工夫都懶得做，又點可以用「冇經驗」為藉口，事後話「經一事，長一智」？人哋偉哥接受太空人訓練，就係因為瓣瓣做足，認真一絲不苟，次次演習都當正真正升空咁嚴謹，咁先至獲得國家賞識，千萬人之中獨係揀中佢！
另外，神五載人太空船副總指揮胡世祥話，今次神舟升空，係要加強全民凝聚力，並且高呼：「團結就是力量！」阿董上台六年，不但搞到全香港，成個公務員隊伍冇晒凝聚力，重專門大搞分化，例如平機會主席，阿董就唔識得主動去團結吓胡紅玉，用咗個王見秋嚟高調掃場，秋官亦唔肯團結吓國際人權專家余仲賢，未上任，先炒魷，搵窿搵罅，四處挑起民怨。阿董身邊，成班廢柴，係咪應該改請胡世祥同志做佢政治顧問？
偉哥回答傳媒，講到老婆，亦好識冧女人，佢話今後想陪多啲老婆，做吓家務。相信呢一句，亦係全港六百萬人對阿董嘅共同要求，想阿董管少啲政務，返屋企幫董婆同菲傭做多啲家務，例如洗吓碗、吸吓塵、抹吓香島小築啲玻璃窗，諗少啲治港嘅藍圖大計，阿董若果肯還原為一個全職住家男人，香港經濟就會快啲復甦。
偉哥訪港，本來某方面計準時機，諗住大事宣傳「愛國」，點知半途殺出條南生圍鱷魚，搶晒頭版，不過都係好事，因為令香港人多咗一個圍觀嘅選擇。真係要查吓，呢條鱷係咪啲港英餘孽偷偷哋放嘅，陰謀轉移港人視線，打擊偉哥嘅形象？
至於電視台直播「與傳媒對話會」，好多新聞界人士都問使唔使咁大陣仗。明明係「對話」，點解只有記者問偉哥，唔見偉哥問吓啲香港傳媒：呀，你哋啲新聞自由係點運作呢？乜嘢叫狗仔隊呢？同埋你哋對阿董有乜睇法呢？
傳真︰2623-9278
電郵︰