港股噚日再向上，挑戰12500，但升至12537之後就出現獲利回吐，以12440收市，升幅收窄至53點。
不過，高位沽壓又唔算好大，全日成交只不過160億元。e莉莎話，今次好友可能只係想試吓向上阻力有幾大，順便震吓倉，後市真正阻力估計在12800。
噚日市場焦點，除咗滙豐（005）能否升破122元再創歷史新高外，就係成交突然大增至2.4億元嘅軟庫發展（648）。軟庫發展急升21%，收0.097元。
軟庫股價大升兩成後，市值都只不過得3.24億元（港交所網頁資料）。但從噚日成交股數來看，軟庫幾乎全部股份轉咗一次手，成交主要經過自動對盤進行。
有消息話，有國內企業想借軟庫個殼上市。據聞大股東日本軟庫噚日已沽清手上約30%股權，而接貨者好快就要現身，但由於接貨者所購入的股權會少於30%，故不會提全購，所以唔好諗住有人會以每股0.102元（噚日高位）提出全購。
中海油（883）話可能向母公司收購下游業務，股價噚日升3.6%至15.85元，佢阿媽旗下嘅海油服務（2883）亦升13%，收2.60元。。
萬勝集團（376）急升6%後停牌。據聞公司以先舊後新方式配股集資8000萬元，主要用於投資上海通用化工技術研究所成立的合營公司。聽聞萬勝配股反應唔錯，復牌之後可能會即時開車。
阿 虎