呢兩個禮拜羅新基東奔西走，頻頻撲撲，搞到手機小圈子都停咗兩個禮拜，真係唔好意思。所以今次一返到香港就拿拿聲掃勻各大場，睇睇有乜新鮮猛料送畀大家，廢話少講，去片！
文：羅新基
快譯通部PalmOS手機G18都出咗成兩個月，反應都唔錯，不過早兩日就見到有部外形同G18有九成相似嘅機，牌子叫FRIENDS。羅新基都知OEM呢樣嘢極為普遍，但係都手多多拎上手玩吓，睇吓同G18有乜唔同。FRIENDS外表同G18九成相似，不過內裏行嘅並唔係PalmOS，而係自行開發嘅OS。雖然係咁，不過呢個「朋友」都有齊G18有嘅功能；影相、PDA、MMS一應俱全，開價$2,880，比G18重平幾百蚊，呢個「朋友」都認真唔話得。
查詢：23800718（樂駿電訊）
樂記部X70來勢洶洶，有啲台重已經收緊預訂，睇嚟呢一兩個禮拜都隨時會散貨落場。不過行貨未到之前，水貨就已經賣到通街都係，而且呢批由泰國嚟嘅水貨，唔單止SellX70機細影相靚咁簡單，重「特別加料」附有十幾張泰式美女圖片，開機閂機都有美女跳舞，睇到羅新基索索聲。而呢批水貨X70唔單止送靚女相，就連「多啦A夢」都有Wallpaper同鈴聲，真係大人細路一網打盡。水貨X70開價$3,880，同行貨個價都差唔多，羅新基就認為睇定啲都未遲。
查詢電話：23987320（鉑匯科技）
