唔少發展商起住宅新樓前，都會喺物業附近做意見調查，睇吓啲街坊覺得點樣至係最好，再因應需求嚟設計個盤。多年未有賣樓嘅置地，近排就忙緊推售西環單幢樓綠意居，咪以為個盤只得140伙就唔緊張，原來置地兩年前已喺堅尼地城一帶，派問卷做調查，評估街坊對區內新樓嘅間隔同設計等需求，結果有成300幾個回應，置地總結意見後，將綠意居半數建兩房、半數3房，兼顧上車客同換樓客需要。
為咗答謝街坊嘅寶貴意見，置地重向每位被訪者送出一份銀造嘅開酒器，重派人專程送上門，夠晒誠意。
另外，佢哋喺赤柱嘅海灣園，示範獨立屋就快完成裝修工程，下個禮拜就有得睇，已經有本地投資客同埋外資銀行嘅要員出價洽購，可望月內落實。
土瓜灣傲雲峰封盤超過1年後重推，發展商為咗跟貼潮流，特登再花1億元，為會所及大堂增值，整靚啲準備新一輪嘅銷售。
新世界何伍燕榆噚日就逐一介紹新設施，首先大力推介入口大樓嘅圓拱形幻影天幕；另外，大堂個音樂噴泉可以跟住音樂，製造出唔同嘅幻彩圖案，喺私人屋苑都算少有。至於會所，裝飾都落足本，何太話佢哋用咗150萬，添置咗一盞大型水晶燈，高28呎，有10萬粒水晶，相當宏偉。
現貨就要遲啲先有得睇，所以就特別派發咗一張模擬相，等買家預先了解吓；遲啲示範單位開放，重可以睇埋模型。
噚日太古同中原搞嘅維景灣畔記者會，以桌球作為餘興節目，由太古馬淑貞負責開球禮，第一球應聲入袋，雖然係白波，最緊要一擊即中。
大家打得興起，中原黃偉雄亦落場玩咗陣，順便講埋中原嚟緊嘅新計劃──贊助醫院管理局，向部份病人家屬贈送「公筷」，推廣良好衞生習慣。
初步中原已贊助10萬大元。筷子樣辦最快月底出籠，下個月就會出街，反應好唔排除會加碼；不過，黃偉雄強調，暫時不會向一般食肆派發。
面積達60萬方呎，足以問鼎東九龍區最大型商場寶座的觀塘創紀之城五期商場，發展商新地今日舉行大型派對，借用創紀之城一期部份停車場，製作萬呎舞台，招待約500名貴賓，除新地代理執行董事雷霆外，重安排特別節目，邀請名模Rosemary，影星谷祖琳等出席助興。聽講今次斥資共200萬銀。
新地代理屋邨管理部副總經理（租務）馮秀炎話，今次係新地首次為一個即將出租嘅商場，製作舞台展館，招待各商戶，而呢個7層高嘅商場，今日開始招租；至於整個項目，連同寫字樓及停車場，總樓面有130萬方呎，預期明年底可以落成。
蘭西
電郵地址：
