701收料站:海天勿過份憧憬

701收料站:海天勿過份憧憬

昨日最多人談論的股份,相信係軟庫發展(648)莫屬。軟庫令人注目的地方,唔係股價大升21.25%,而係成交股數高達26億股,金額亦高達2.44億元,超過佔軟庫已發行股數的四分之三,認真唔簡單。
經紀陳話,此乃傳統智慧中,大戶沽貨,愈沽愈高的一個例證。由於大股東日本仔講到明唔再玩落去,要將咁大批貨沽出嚟,點都要花多少心思,先至有機會沽得晒。
既然大股東都唔想玩落去,投資者實在冇乜理由上車跟炒,但唔排除有啲既夠眼光又夠膽嘅炒家,走去玩即日鮮,所以場面咁熱鬧。軟庫噚日最高見過0.102元,收0.097元。
另外,今日又有隻新股西安海天天綫(8227)掛牌上市,雖然近排隻隻新股上市都升得唔錯,但小初對呢隻股今日嘅表現就有多少保留,因為根據上市搞手嘅往績,佢哋嘅作品一般都冇乜得炒。
海天雖然配售錄得超額認購,但仍然以招股價下限定價,幕後人點諗,相信可以估到一二。
慕容小初