新車速報：<br>平治SL350新偈辣車

新車速報：
平治SL350新偈辣車

近年，多款平治新車先後抵港，除全新C-Class及E-Class外，頂級開篷跑車SL車系亦屬其中一員；但奈何只有輸出狠勁嘅SL500及SL55AMG型號供選擇，或未能迎合部份車迷要求。故此，代理響最近便引入埋配用3.7公升V6偈嘅SL350型號抵港。究竟新車有幾正？大家不妨一齊嚟睇睇。

記者：何永仁　攝影：陳偉強
ImageGirl：瑤（Imagine）

■關上硬摺頂後，乘客仍可透過天幕式車頂，與大自然有親密接觸。



平治SL跑車可算係車迷嘅DreamCar之一，皆因佢不但擁有突出嘅造型，極豪華嘅車廂配搭及出眾性能表現，都係賣點之一；而新近抵港嘅SL350，除有齊上述優點外，一台全新3.7公升V6偈配搭，重有運轉寧靜及低耗油量嘅特性，更能切合香港路面嘅需要㗎！

狠辣造型出眾吸引
與其他SL系列跑車一樣，新近抵港嘅SL350，外形同樣顯現出一份高性能跑車韻味，當中極具吸引力嘅車首設計，襯以17吋跑車合金胎軨及車身兩旁嘅入氣柵格，就最能將呢個特點展露出來；而開關硬摺頂亦只需輕按設於波棍後方嘅控制鍵，便可於16秒內完成整個過程，加上屬玻璃頂設計，故此就算關上篷頂後，乘客亦可透過天幕式車頂，與大自然有更多親近嘅機會呢！

■開關篷頂時，只需輕按設於波棍後方嘅控制鍵，便可於16秒完成整個過程，十分方便。



跑車化座艙最矚目
新車不但外形設計極富跑車氣息外，其車廂布局亦見有相呼應嘅效果，除以高級真皮及瑰麗桃木裝飾配襯，望落豪邁氣派十足之外，一雙承托力甚豐嘅高級真皮跑車座椅，更備有電控調校連記憶功能。設備配搭方面，原廠高級音響、恒溫冷氣、車門電窗等等可謂一應俱全，使用時甚為方便。另外，半皮半桃木軚環上更備有各設備之控制鍵，而Easy-pack系統亦方便你於開篷後，於尾廂提存物件㖭！多個安全氣袋連防滾架組合，亦能保障乘客安全。

■車廂布局簡潔清晰，加上高級真皮及桃木配襯，倍感豪邁氣派十足。

■兩邊門鏡設有方向指揮燈，令人更易掌握你嘅去向。



3.7V6偈輸出強勁
新車以一台3.7公升V6偈作核心，動力輸出充裕之餘，匹配一套5前速半自動波箱，不但有駕駛自動波車嘅方便外，並可有操控手波車嘅樂趣；然而，跑車化懸掛組合，響剛勁有度嘅底盤及多套電子系統輔助下，行車循迹性亦見不俗。四輪高效能碟式制動，輔以ABS、BAS及SBC等電子裝備，收放自如之感可謂盡在不言中呢！

■雙出式跑車尾喉配搭，引擎呼吸變得更暢順。

■設計獨特嘅表板突出之餘，資料亦見豐富易讀。

■一套5前速半自動波轉檔靈敏暢順，亦能予人操控手波車嘅樂趣。

■四幅式半皮半桃木軚環附有各設備嘅遙控鍵，方便易用。

■中控台上有齊原廠音響及恒溫冷氣等設備，可謂一應俱全。

■一雙高級真皮跑車座椅，絕能予人靠貼合攏之感。

平治SL350規格
引擎：3724ccV6DOHC
馬力：245ps/5750rpm
扭力：35.7kgm/3000-4500rpm
傳動：5前速半自動波
懸掛：（前）四連趕（後）多連桿
制動：（前）透氣碟（後）碟式（ABS）
輪胎：255/45R17
尺碼：4535×1827×1298mm
軸距：2560mm；車重：1755kg
0-100公里：7.2秒；極速：250km/h
平均耗油：11.5L/100km
新車售價：$1,210,000
車輛提供：仁孚行（28957288)

記者評語：更切合需要
今回抵港嘅平治SL350，外形及車廂布局不但保留原來SL跑車嘅神髓外，一台3.7公升V6偈，不但動力輸出充裕，匹配一套5前速半自動波箱，性能表現亦見不俗，而且更能切合本港路面需要㖭！

瑤評語：玻璃硬摺頂最正
新車賣相獨特吸引，而佢嘅玻璃硬摺頂不但開關容易，就算關上篷頂後，仍能讓乘客可透過天幕式車頂，有親近大自然嘅機會呢！