前米杜士堡領隊白賴仁笠臣果然跑慣江湖，雖然未簽實做尼日利亞國家隊教頭，但係就第一時間傾掂啲人工點畀佢，保障自己先。
話說尼日利亞足總過去有欠前教練人工嘅前科，所以笠臣幾大都先小人後君子，要求先畀三個月人工一共十五萬美元（約一百一十七萬港元），否則半年合約屆滿，足總突然唔出糧畀佢，咁笠臣變咗真係做義工！
所以笠臣講明，如果同有「超霸鷹」之稱尼日利亞講唔掂數，佢即時轉軚唔教。果然醒目！聽聞剛炒領隊嘅水晶宮𠵱家想搵佢坐鎮㖭，唔怪得笠臣想轉軚啦！
話時話，如果三個月過咗，尼日利亞隊有迹象唔畀錢，咁我求大俠就建議笠臣見勢色唔對就校腳，否則成為球壇笑柄，重使撈嘅？
華倫證實車路士用八百萬鎊斟佢哋嘅阿根廷後衞艾耶拉，但係車仔中堅泰利立即彈出嚟話隊中後防球員過多，叫領隊雲尼亞里唔好再買人。但查實迪西里同加拿斯有傷，就只有侯夫可以替上，明明係唔多夠人用，泰利咁樣講，擺明自私心咗啲，驚死唔夠艾耶拉爭及冇得踢就真。
史特加教頭馬加夫同佢行咗十五年嘅女友妮歌拉，喺十二月拉埋天窗。原來佢哋二十年前已經相識，細馬加夫十三年嘅妮歌拉重係一見鍾情嗰隻，但又唔想拆散馬加夫個家，直到九七年馬加夫離婚兩個先一齊。馬加夫人逢喜事精神爽，史特加今屆成績又理想真係羨慕死人。
繼列斯前鋒阿倫史密夫掟樽後，甲組新特蘭球員威廉士上周六對西布朗時，一腳勁省個波不幸轟中一名女球迷，重不省人事㖭；𠵱家威廉士可能會俾警方同足總告，佢話唔係故意咁做，又話當時場內有兩個波，所以先至大腳踢個波去看台。
所以話睇波都要打醒十二分精神。