何超儀無論幕前幕後，舉止言論都大膽出位，佢就快結婚，婚前作品《豪情》都可以話係毫無保留豁出去，佢喺《豪》片飾演一名叫趙郎郎嘅骨場妹，本來長期坐冷板櫈，點知因為「服侍」過陳奕迅一次後，搖身一變成為骨場紅人，咁激嘅角色真係人人睇過都留下深刻印象啦！
超儀老竇、賭王何鴻燊前晚同兩個女超瓊同超鳳出席女童軍慈善舞會，問賭王有冇睇過個女喺《豪情》嘅大膽演出，賭王話：「套戲太長啦，我本來都想睇半個鐘嘅，但係超儀叫我唔使嚟（首映）啦，況且呢排報紙咁多報道呢套戲，睇報紙咪得囉。」咁又係，超儀喺部戲入面咁激，又點敢叫阿爸去睇呀，不過唔知陳子聰睇完有乜感覺呢？再問佢超儀大婚在即，有冇教番佢兩招御夫術？賭王就話：「呢啲等佢阿媽教啦。」至於會唔會唔捨得個女？賭王就話：「個女大個就梗係要嫁㗎啦。」吖，估唔到賭王都幾豁達噃！
曾航生做歌手之餘又去從政，佢嚟緊會參選港島東區區議員，點知最近佢又推出VCD《唱作學堂》，重打算喺電視播廣告，但係出碟時間同選區議員時間相約，曾航生出席完選委會主席胡國興主持嘅候選人簡介會之後，知道VCD宣傳會令佢犯規，就決定張碟押後推出，原定十一月播放嘅廣告都要抽起，等選舉完先搞喎。其實取消出碟又算唔算宣傳咗呢？
朱孝天上次嚟香港做台劇《狂愛龍捲風》宣傳，機場得兩、三隻小貓接機，噚日佢再嚟香港，準備喺今日同梁詠琪一齊飛去上海，為電影《愛斷了線》做宣傳，呢次佢就醒神好多啦，除咗帶住三個LV袋做行頭外，重有二十幾個fans接機，有女fans一見佢就用國語講：「很想你，加油啊！」𠱁到朱孝天鬼咁開心。
謝天華同趙學而噚日喺將軍澳電視城為無綫《皆大歡喜》開工，問到有報道話佢哋經常遲到，所以被無綫雪藏，學而話對於是非嘅嘢都唔想講，反而謝天華就話：「你唔見我融咗雪咩，成地都係水啦。你哋咁寫我咪咁講囉，其實個個都有呢個問題，不過之前我同學而戲份重啲，遲到相對係多咗，𠵱家我哋已經掌握到啲時間。」
黃伊汶噚日去港台接受訪問，重大玩塔羅牌，預言佢出年會多桃花同埋有機會拍拖，問Emme心目中可有對象，佢話自己心入面重一直掛住以前男朋友，但對方𠵱家已經有女朋友，不過大家有時都有聯絡，至於會唔會復合，佢就話唔知，因為重有道氣喺心入面。但其實馮仁昭就覺得佢好應該放棄，無謂為一棵樹放棄一個森林吖！
關心妍噚日去港台接受訪問，佢話公司近日下令要佢減肥十磅，等佢減咗啲babyfat，可以喺年尾頒獎禮上着衫靚啲，同埋佢𠵱家幫緊美容公司做代言人，身形瘦啲都可以考慮影輯靚嘅三點式泳衣相，但佢就話減肥呢個階段好辛苦，夜晚有時肚餓到瞓唔着覺。唉！有得辛苦，都好過有啲藝人日日冇嘢做留喺屋企猛食吖。
