關於「耳鳴」一事（見十月二十四日本欄），因讀者反應極為熱烈，呢幾日《蘋果》轉來六十幾封電郵，左丁山窮於應付，叫秘書小姐傳真讀者提供嘅藥方，佢逐封傳真，傳到索氣，搞唔掂。於是與編輯商量，將讀者藥方（原文手寫）打字，輸入電腦，以後凡有來電郵索取嘅，由編輯搞掂。不過必須再次聲明，讀者提供耳鳴藥方，只供參考之用，請各位徵詢中醫專家意見，慎重考慮個人體質、健康情況，先至服藥，《蘋果日報》與左丁山只係做信差而已，絕不負上任何責任。
自然療法專家梁柏濤傳來佢嘅文章，解釋耳鳴成因，講述種種侵害耳朵嘅毒素，因專有名詞太多，左丁山睇完都唔知講乜，只能講一聲多謝。
女讀者E來電郵講佢位千金在美國東岸讀社區學院，已得Purdue（普渡）大學收錄讀工程，學校輔導員極力推薦。但讀者E位千金恐怕普渡大學排名低，亞洲僱主唔熟悉，驚畢業後返嚟搵工遭歧視，想話等密芝根（唐英年母校）。
既然係問左丁山意見，不妨直講，亞洲僱主對美國大學嘅學科棑名唔熟，只睇學校名氣，乃是實情，好多回流學生搵工就受到此苦。不過普渡嘅聲譽唔曳，工程科更加名聞世界，工業藍籌股德昌電機嘅老闆CEO汪穗中就係普渡大學工程學院畢業生，亞視陳永祺亦然，如果讀者E位千金返嚟搵工程方面嘅工作，入工業公司做，應該唔會受歧視嘅！