股壇長毛DavidWebb蟄伏幾個月後又再出動，今次會去恒隆地產股東會踩場，據聞恒隆方面已經有晒策略招呼佢，主席陳啟宗詞鋒一向尖銳，到時有好戲睇。
講開陳啟宗，佢係科技大學嘅校董，同班科大學生好老友。噚日佢請來科技公司Sybase董事長程守宗去科大講talk，八方想搵佢回應DavidWebb準備踩佢場單嘢，於是走入科大搵佢，點知見到佢派緊啲相畀學生，重逐個叫名，完全認得晒班學生。班學生話啲相係陳啟宗操刀，八方攞畀旁邊位攝影哥哥睇，連專業人士都話有水準。
陳啟宗話自己都有授課，咁教過乜呢，點知班學生好怕羞，冇人開聲，陳啟宗即刻笑：「喂，幫手賣吓廣告都好噃。」好彩讀電子工程系一年級嘅Javy幫口，話陳校董見過唔同國家嘅人，經常提及佢哋嘅成功經驗，又分享營商之道，令佢哋即使未入商界，仍能眼界大開。呢個校董都算唔話得。
（圖）陳啟宗派自己嘅攝影作品畀一班科大學生，重記得晒佢哋啲名。
傳真︰2623-9278
電郵︰