老董唔知好命,定係生肖屬牛,總之大難不死都做餐死。中央派太空人楊利偉來港為佢打氣,於是佢又要去接接送送,咁偉哥未走,副總理曾培炎噚晚又殺到,準備出席今日美國《商業周刊》主辦嘅CEO年會。
咁重磅嘅人物,老董當然要親自去機場迎接,重喺禮賓府擺番一圍為曾副洗洗塵。八方睇見當局發出嘅新聞相,兩個司長唐英年同梁愛詩都着得靚靚企喺度等握手,獨不見煲呔,莫非真係如此大細超?抑或煲呔真係俾人徵召咗去元朗南生圍打大鱷?
除咗兩司之外,冬冬廖秀冬、林D9以及林煥光聽講都有陪同食晚宴,都唔知老董點揀飯腳嘅,咁當然董太一定有份啦。
曾培炎同香港都好有緣嘅,佢今日演講完,會去參觀交易所同深港西部通路,之後重會去睇空運貨站。
老董就唔陪得佢咁多,去完CEO會議,就要趕去送太空人,你話幾唔得閒。
(圖)副總理曾培炎(右)訪港,老董(右二)梗係非常緊張,派出(左起)冬冬、詩姐姐同唐唐迎接,但冇煲呔份。 政府新聞處圖片
傳真︰2623-9278
電郵︰