上周六經紀陳先至話完光大科技（256）舊聞新炒傳賣盤。點知話口未完，隻股噚日就一條氣咁炒上，小初真係追貨都追到氣咳，但經紀陳反而悠悠閒沽貨獲利。
收市之後經紀陳先至話，雖然光大控股（165）揸咗光科4成股權，倘若真係賣仔嘅話，照計會有全面收購，但江湖傳聞，收購價唔係咁靚仔，分分鐘低過光科噚日收市價，所以平心而論，真係冇乜理由高追。
聽完之後，小初幾乎被激死，惟有寄望控股權落實易手時，會刺激股價上升。
光科噚日最高見過0.385元，收0.37元，成交股數較平日急增，有成1.08億股，金額3987萬元，相信好多千年蟹貨都已經沽晒出嚟。
另外，同系嘅光大國際（257）噚日停牌。經紀陳話，江湖有兩個傳聞，一係搞收購，一係搞抽水，但家陣重未清楚。
小初心諗，如果光大系真係咁多嘢搞，冇理由唔番轉頭睇吓阿媽，斷估會穩陣過啲仔仔女女啩？
慕容小初