自嘲係「最大乞兒」嘅理工大學校長潘宗光，最近成功爭取到中國十大富豪嘅其中一人，捐咗五百萬畀理大，潘校長唔肯講係邊位先富起來嘅精英咁疏爽，俾佢化緣成功，總之好高興咁話呢筆係第一筆內地企業向香港嘅大學捐款。錢差唔多到手，點知大學教育資助委員會突然話唔得，要捐款人兌番港幣再喺香港捐畀理大至算數。
問題係，人民幣雖係我國認可嘅合法貨幣，照正計唔係自由兌換嘛，經自由行帶落嚟都要走好多轉，「捐錢畀你重咁煩嘅？」潘宗光驚人哋容乜易話「費事啦」。
理大老友話，《蘋果》嘅漫畫好抵死咁畫咗潘校長嘅「大乞兒」look之後，好多校友出於憐憫心，都主動打電話番母校捐錢。理大家吓已經籌到超過一億。近日潘校長重帶頭捐出三十五萬，兼且揼埋副校長至院長十個人嘅心口，成立一百萬元「理大配對基金」嚟鼓勵同事捐錢，都話新馬仔扮乞兒，扮到發達啦，佛教徒潘校長終於開悟喇！
傳真︰2623-9278
電郵︰