闊佬要送出三千萬的豪宅，城中十八至四十八歲日日造神舟飛天白日夢的女人確係難拒誘惑，接受餽贈，付出親密關係的代價，順理成章。拒絕大禮，反而需要度橋推搪。我想過，如果闊佬有這個offer，我會這樣請他食檸檬。
一唔該你照吓鏡，又唔係尊子。
二我家裏太細，床下底太窄，塞唔落這件厚禮。
三可不可以套現成三千萬隻大閘蟹？唔得？罷就。
四叫我住喺李柱銘隔籬，半推半就還可以。住喺葉劉淑儀左鄰右里，就相當危險，驚住會被她的黑超和貼身衫褲邪住。不過最冒險還是跟王見秋出出入入，爭𨋢搭時，會不會被咒詛「你正步向自己的葬禮」？
五擁有市值三千萬的豪乳就話驕人啫，三千萬豪宅，連「高級文員」都住得起，在首富李嘉誠眼中，只算係員工宿舍，冇乜吸引。
六出手咁爽，老細，間屋係咪鬧鬼？
七我老竇唔係退休大法官，對三千萬豪宅唔起痰，sorry囉。